Alka Ka Bhai
Alka Ka Bhai Part 1
|
Ek shaam
chai ke waqt Saurabh ne kaha "Malti humne apne bacche
ka naam Madhur to rakh diya hai par iska asli mazhab Hindu
hai ki nahi hume nahi pata." Malti ne jawab diya "maine
iska naam isiliye Madhur rakha hai jo har mazhab ko mankar
chalega aur jo bhi iske zindagi me aayega uska jeevan iski
maadhurya se bhar jayega." "Wah! tumne bhi khoob
kahi Malti," Saurabh ne hanste hue kaha.
Din beette gaye.
Madhur ab dhai varsh ka ho gaya tha. Malti ne usse paas ke
play school 'Nanhi Duniya' mein daal diya tha. Wahan aur nanhe
munne baccho ke saath uska beta khush ho jata tha. Ghar ke
sare naukar-chaakar Madhur baba pe fida they aur woh sabki
aankhon ka tara ban gaya tha.
|
Madhur jab sadhe teen
saal ka hua tab Malti ne ek nanhi si gudiya ko janm diya. Dheere
dheere Madhur aur Alka college ki padhai karne lage. Madhur engineering
poori karne wala tha aur Alka graduation poora karne wali thi. Dono
ek doosre se ladte jhagadte rahte the par dono me behad pyar bhi
tha. Madhur apni behen ka bahut khyal rakhta tha. Use hamesha padhai
mein madad karta tha, ghumane le jata tha aur garmiyon me har sham
ice cream khilane le jata tha. Dono ke dost milkar film dekhne aur
picnic par jaya karte the. Maheene mein do baar dinner par jate
they jahan ek baar Madhur ki treat hoti thi aur agli baar Alka ki.
Dono ek doosre ko
beshumar tohfe diya karte the. Aaj sham ko unke banglow me party
thi. Aaj Madhur ka janam din manaya jata tha. Malti ne usi din ko
jab Madhur use ghar ke darwaze ke bahar mila tha, Madhur ka janam
din maan liya tha.
Subah se hi party
ki tyyaari shuru ho gayi thi. Bahadur poore ghar ki sajawat me Ramdeen
mali ki madad kar raha tha. Har kamre me phoolon ke sundar guldaste
rakhe gaye the. Madhur ne phoolon ki sajawat dekhkar kaha, "Ramdeen
kaka itne saare phool kya hamare bagan ke hain?" "Nahi
maine Vermaji aur sharmaji ke yahan se bhi guldaste bana laye hain.
Unhone kaha Ramdeen Madhur ke janam din ki party hai tab saare phool
le jao. Hum bhi shaam ko aakar unki sundarta ka aanand uthayenge."
"Achha ye baat hai. Khair jo bhi ho kaka tumne guldaste bahut
sundar sajaye hain."Bhola aur Rani pakwan banane me lage the.
Bhola ke do dost Ram aur Shyam madad karne aa gaye the. Dono ne
kabab aur samose ka jimma liya tha. Rani rajma banane me maahir
thi aur Bhola sandwich, bread roll aur rasgulle bana raha tha. Cake
ka order Flury's ko diya hua tha.
Aakhir sham hone ko
aayi aur mehman aane shuru ho gaye. Sabse pahle unke padosi Sharmaji
aur Vermaji ka parivar aaya. Verma parivar ki naukrani Kamla bhi
Rani ki madad ko aayi thi. Usne aur Sharmaji ke naukar Raju ne milkar
cold drinks ka jimma liya. Alka ne gulabi rang ki chiffon ki sari
pehni thi jispar safed seepiyon aur motiyon se kadhai ki hui thi.
Yah sari uske bhai ne use apne janm din par dee thee. Saath me gulabi
sandal aur kaan ke tops jo ki motiyon ke the, Alka ko sundar bana
rahe the. Madhur ne bhi apni bahan ka diya hua tohfa pahna tha.
Kali pant aur neela aur kala T Shirt. Joote aur nayi ghadi use mummy
papa ne diye the.
Alka ki saheliyan
jo khas khas thi ek saath jhund banakar drawing room me daakhil
huin. "Arey Shalu, Meenal, Prerna, Chanda, Juhi, Seema aa gaye
tum sab. Aao mere bhaiyya se milo. Madhur bhaiyya dekhen ye hain
meri saheliyan." "Hello sabhi ko aur ab mere doston ki
intro to ho jaye. Ye hai Sameer, Manish, Saahil, Chetan, Shyamal,
Tarun aur Rakesh. Arey haan inse milo ye hai Tanuja, Rakesh ki cousin
jo America me rahti hai aur chuttiyon me yahan aayi hui hai."
Saurabh ke office
ke kuch colleague aaye the aur Malti ki kitty party ke members bhi
aaye the. Shagun, Sonali, Vaidehi, Ratna, Shobha, Bhawani aur Nupur.
Abhi cocktails chal rahe they jab ki Malti ki saheliyon ne shor
machaya "arey Alka tumhara gana bahut dino se nahi suna hai.
Ab zara bina nakhre ke ek acchi si gazal sunao." Madhur ke
doston ne bhi zid ki aur Alka ki saheliyon ne use beech me kheench
kar khada kar diya. Alka ne Madhur ki oar dekh kar kaha "main
ek shart par gaaoongi - Bhaiyya ko mera saath dena hoga. "
"Theek hai Alka teri agar yahi shart hai to mujhe manzoor hai.
Par meri bhi ek shart hai. Tumhari saheliyon ko bhi ek gana sunana
padega." "Theek hai bhaiyya wo sab bhi gaayengi."
Party ab khatam hone
ko aa rahi thi. Sabne khoob khaya piya aur enjoy kiya tha. Tanuja
to Alka aur uski saheliyon se itni prabhavit thi ki aane wale dino
ke liye ghoomne, movies aur shopping ka plan bhi sabke saath bana
liya tha. Aakhir Bunglow me roshni dheemi ki gayi aur thake hare
log neend ki godh me chale. Malti ne socha ki wo kitni kismet wali
hai ki Madhur use bete ke roop me mila jiski shagun se use Alka
mili.
Contributing Story Teller: enjoys writing stories
and poems. She has strong editing and translation skills.
Want to get a short
story written for children? Do you want someone to write inspirational
stories for your magazines, website or newsletter? Contact her at
amita17149@hotmail.com
|
