Alka Ka Bhai
Garmiyon
ki shaam thi. Lawn me Mrs. Malti Sinha baith kar magazine ke panne
palat rahi theen. Itne me Bahadur chowkidar ne aakar kaha "memsaab
main do minute ko chai lene kitchen me gaya tha. Laut kar gate par
gaya tab kya dekhta hoon ki ek baccha kapde me lipta gate ke paas
pada hua hai. Pata nahi kaun chod gaya hai." "Arey Bahadur
jisne bhi choda ho, tum kyun use akela chod aaye. Andar le aao mere
paas." "Jee memsaab," kahta hua Bahadur bahar ko
bhaga. Malti ne magazine table par rakha aur utavali hokar bacche
ka intezar karne lagi. Thodi hi der me Bahadur vapas aaya aur Malti
ne bacche ko apni godh me le liya. "Arey kitna pyara baccha
hai. Bahadur zara kitchen me jakar Bhola se thoda doodh garm karva
ke ek katore me le aao. Aur haan ek chota chammach bhi lana."
"Jee memsaab," kahta hua Bahadur kitchen ki oar chal pada.
Malti ne kursi par baith bacche ko godh me sambhala
aur usse baaten karne lagi.
|
|
Itne me Bahadur
aur Bhola dono Malti ke paas aakar ruk gaye. Bahadur ne katora
pakda tha aur Bhola ke haath me chammach tha. "Ye leejiye
memsaab doodh." Malti ne chammach se doodh pilaya aur
bacche ne aaram se pee liya. Katora khatam karke Malti ne
apne sari ke aanchal se uska muh poncha. Itne me Rani ne aakar
kaha "malkin aapka phone hai. Saahab baat karna chahte
hain." "Accha tu bacche ko sambhal. Main phone sunke
aati hoon." "Arey kitna pyara baccha hai, laayiye
mujhe deejiye." Malti ne baccha Rani ko pakdaya aur phone
sunne gayi. Is beech Bahadur aur Bhola ne bhi bacche ko pyar
se bari bari godh me uthaya. Malti baahar aayi tab teeno ne
poocha "mem saab aapne nanhe baba ke baare me saahab
ko bata diya?"
|
"Arey nahi re,
unko aane do phir bataoongi. Wo hairan ho jayenge bacche ko dekh
kar. Office se chal rahe hain. Aadhe ghante me pahunch jayenge.
Bhola tum zara besan ka halwa aur pakode nashte ke liye bana lo.
Saahab ko bahut pasand hai. Rani de baccha meri godi me." "Abhi
banata hoon memsaab," kahkar Bhola ne kitchen ka rukh kiya.
Bahadur gate pe chala gaya aur Rani sham ke dusting me lag gayi.
Malti bacche ka chehra aise ghoor rahi thi jaise use phir nahi dekh
payegi."Kiska baccha hai Kis ma ne aise pyare jeev ko chod
diya hoga." Man me uske tarah tarah ke sawal uth rahe the.
Itne me gaadi ki horn
sunayi di aur Mr. Saurabh Sinha gaadi me se utar kar lawn ki taraf
aaye. Bansi driver ne gaadi ko theek se laga diya. Itne me Bahadur
ne aakar use bacche ke baare me bataya. Naukaron me badi khalbali
machi thi. Saurabh ne Malti ki godh me bacche ko dekh kaha "arey
ye nanha munna kiska hai?" "Aap baithiye. Main batati
hoon. " Malti ne muskara ke kaha. Saari baaten sunkar uske
pati ne police me khabar dene ki rai di. Ispar Malti ne sujhav diya
ki kyun nahi ek do din dekh liya jaye. Agar koi bacche ko lene vaapas
aata hai tab de denge nahi aaya koi tab phir soch lenge ki kya kiya
jaye. "Par Malti iski dekhbhaal kaun karega." "Rani
sambhal legi aur phir main bhi hoon," Malti ne zid karte hue
kaha. "Accha theek hai par iske bare me koi phaisla karna
hoga.
Tabhi Rani aur Bhola
chai nashta lekar aaye. Saurabh ne bhi tab tak kapde badal kar haath
muh dho liya tha. "Rani bacche ko sambhalo, main chai banati
hoon." "Theek hai bibiji, laayiye mujhe deejiye."
Do din ke badle char din beet
gaye par koi bacche ki khoj khabar lene nahi aaya. Chauthe din shaam
ko Saurabh ne office se aakar Malti se kaha "ab to police me
khabar kar dena chahiye, kyun hai na Malti?"
"Suniyeji ek
baat kahna chahti hoon aapse," Malti ne pyar bhari andaz se
baat shuru ki. "Kyun na hum is pyare se bacche ko apna beta
banakar hamesha ke liye rakh le. Mera man ab iske bina nahi lagega.
Madhur mujhe jaan se bhi zyada pasand hai." "Arey tumne
iska naam bhi rakh diya. Madhur, accha naam hai par Malti baad me
kabhi iske ma baap ya koi rishtedar lene aa jaye tab hum kya karenge."
"Jab ki jab dekhi jayegi. Mera man kahta hai iski ma yahi chahti
thi ki uska baccha hamare paas pale. Agar baad me koi aa hi gaya
tab main khoon ke ansoo bahakar apne is nanhe phool ko de daloongi."
"Theek hai phir jaisi tumhari marzi, par kabhi socha hai Malti
kal ko tumhare khud ke bacche honge tab tumhara pyar kum nahi pad
jayega Madhur ke liye." "Aisa kabhi nahi hoga. Accha kal
shaniwar hai aur aapki chutti. Kal hum Madhur ke liye kapde, khilaune
wagayrah sara saaman lene jayenge. Bada maza aayega."
Agle din baazar se
lautte waqt Saurabh aur Malti Madhur ko lekar apne dost aur family
doctor Sujit ke clinic gaye. Wahan uski saari jaanch karwai aur
injection ityadi lagwaya. Ek maheena guzar jane par Malti aur Saurabh
ne kaanooni taur pe Madhur ko godh le liya. Malti ka dar ki kahi
uske bete Madhur ko koi wapas mangne na aa jaye, bhi jata raha.
Alka Ka Bhai Continued
Contributing Story Teller: Amita enjoys
writing stories and poems. She has strong editing and translation
skills. amita17149@hotmail.com
Want to get a short
story written for children? Do you want someone to write inspirational
stories for your magazines, website or newsletter? Contact her at
|
