Contribute Original Children Stories with a Moral - content writer

Story About Trust, Faith and Belief in God

 

About contentwriter | Contact Us

Useful Articles

More Short Stories

Submit your Story, Article or Poem

Know More About Our Services

Contact Us contact@contentwriter.in

Advertise With Us

 

Vishvas Ka Phal

 

Madhvi terah varsh ki ek sadharan kanya thi. Rang gehuan aur nak naksh bhi theek thaak hi the, parantu uske chehre par ek anmol aakarshan ka ajeeb sa phailav tha. Uski meethi aawaz aur asadharan buddhi logon par asar chod jati thi. Bachpan me ma baap guzar gaye the isiliye wuh apne chacha chachi ke paas rahti thi. Chacha to uska behad dhyaan rakhte the par chachiji ka bartav Madhvi ke saath accha nahi tha. Chacha ke dono bacche gaon ki pathshala me padhte the par Madhvi ko chachi ne ghar ke kaam me aisa laga rakha tha ki pathshala jaane ka koi sawal hi nahi tha. Subah se raat tak wuh Madhvi ke peeche padi rahti aur dant phatkar kar sara gharelu kaam karwati. Madhvi dukhi to thi par nirashavad me use vishvas nahi tha. Uski ma ne use samjhaya tha ki kisi bhi paristithi me manushya ko haar nahi manni chahiye aur apna kaam man laga kar karna chahiye.

Ma ki shiksha yaad kar Madhvi ghar ka sara kaam aise karti thi ki koi atithi ahanak aaye to use ghar vyavastith milta tha. Baccha budha koi kisi bhi samay kyon na aaye, Madhvi ke chehre ki muskan kabhi dhimi nahi padti thi. Man ki peeda ko kisi par zahir nahi karti thi. Sabse hansti bolti rahti aur atithiyon ka swagat chai, sharbat aur garm nashte se karti. Itni choti aayu me hi usne tarah tarah ke vyanjan banane seekh liye the. Uske haath ki bani pakaudiyan, kadhi, pulav aur damalu khakar log ungliyan chatte rah ate the. Itna sab kuch karne par bhi use chachiaur unke bacche Raju aur Kanchan se kabhi pyar ke do meethe shabd nahi milte the. Nuks nikalne ke siva unhe aur kuch nahi ata tha.

Ek hi kaam ko baar baar karwane me Raju aur Kanchan ko bada maza ata tha. Dukh takleef me wuh sirf eeshwar ko yaad karti thi. Subah uth kar naha dhokar bhagwan ko bhog lagakar hi kuch karti thi. Sham ko dubara aarti karti aur kam karte wakt bhajan gati rahti. Bachpan se hi uski ma ne use eeshwar par vishvas rakhne ki shiksha di thi. Bhagwan se baaten karna usne apne pitaji se seekha tha. Wuh kahte, "beti, kabhi kisi musibat me pado aur kisi sawal ka hul na mile to Ramji se pooch lo. Wuh tumhe zaroor rah dikhayenge. Unke paas to har sawal ka hul hota hai aur jo unki madad leta hai use kisi baat ki chinta nahi hoti." Bachpan ki ye baaten Madhvi ke mastishk me aise vsamayi thin ki ab wuh uski aadat ban gayi thi. Ma baap ke marne ke baad eeshwar me uska vishvasghatne ke badle aur badh gaya tha. Wuh sochti jo bhi hota hai acche ke liye hi hota hai. Eeshwar iccha ke bina ped ka ek patta bhi nahi dolta to phir kyun na main bekar ki baaten chod bhagwan bhakti me apna samay bitaoon.

Kaafi samay beet gaya. Raju ab college me padhta tha. Roz paas ke shahar jata aur sham ko wapas ata. Kanchan ki shaadi ki tyarriyan ho rahi theen. Inhi jadon me paas ke Madhopur gaaon se barat aane wali thi. Jamai raja ka khud ka karobar tha. Kapde ki dukane theen aur ek choti factory me khilaune bhi ban kar shahar me bikne jati theen. Madhvi Kanchan se do varsh badi thi par uski shaadi ki kisi ko parvah nahi thi. Chacha ne do ek baar chachi se is vishay par baat chedi par baat aage nahi badhi. Seedhi si baat thi Madhvi sasural chali gayi to ghar ka kaam chachi ji ko karna padta. Bhala yuh kaise ho sakta tha. Unhe to aaram se baithne ki aadat pad gayi thi. Wuh Madhvi ko hamesha sunati "arey bitiya teri shaadi hona namumkin hai. Rang jo tera kala hai. Kaun kali kaloothi se phere karvayega. Tu to yaheen jami ruh. Budhape me chacha chachi ki seva karegi to bada punya hoga. Samjhi na?" Madhvi unki baaton ka zara bhi bura nahi manti. Chacha ki lachari samajhkar wuh unki dekh bhaal karte hue hi apna jeevan vyateet karna chahti thi.

 

Aakhir Kanchan ke byah  ka din aa hi gaya. Madhvi ne ghar ki sajawat me saari kasar poori kee. Khane peene ka badhiya prabandh kar wuh Kanchan ko sajane me lagi hui thi. Aakhir barat aa hi gayi. Sab log swagat me aage badhe par Madhvi khane ka poora intejam dekhne pichwade chali gayi. Abhi usne pattal vagayrah lagwane shuru hi kiye the ki Kanchan ki saheli Rani ne daudkar kaha "Madhvi, chal aa, dulhe raja apni saali se milna chahte hain." Madhvi ne sari ka pallu theek kiya aur Rani ke saath shamiyane me aayi. Dulhe miyan kursi par baith sharbat pee rahe the.

Jyon hi unhone Madhvi ko dekha hairani se unki ajeeb si halat ho gayi. Unhone jhat peeche khade doston me se apne priye mitr Rajan ko haath pakad kar apne paas bulate hue kaha "Rajan dekh bhabhi." Aaspaas khade log dulhe saahab ki baat sun kar hairan ho gaye. Rajan ki aankhen ektak Madhvi ke chehre pe gadi theen. Madhvi ko kuch samajh nahi aa raha tha. Ghabdakar usne Rajan ki or ek baar phir dekha aur ulte paaon ghar ke andar chali gayi. Rajan ne kursi ka sahara liya aur sar se paseena ponchne laga. Pradeep Kanchan ke hone wale pati ne Rani ko bataya ki do saal pahle Rajan ki shaadi hui thi aur pichli garmiyon me uski patni Renu ka swargvas hua tha. Madhvi ka chehra hoo bahoo Renu bhabhi jaisa tha. Sirf chehra hi nahi balki rang, kud aur awaz bhi wahi thi. Rajan ko aisa laga mano Renu use dubara mil gayi ho. Use baar baar Madhvi ki sundar aankhen yaad aa rahi theen jo bilkul Renu ki tarah sundar theen, sirf ek fark tha. Renu ke baal seedhe lambe the aur Madhvi ke kandhe tak ghungral

Ab tak Madhvi ke chacha bhi wahan aa gaye the. Pradeep ne unse kaha "pitaji aap apni beti Madhvi ki shaadi yadi mere mitr Rajan se kar den touse dubara uski patni mil jayegi jiske bina uski zindagi bekar hi ho gayi hai." Chacha ne hami bhari aur chachi ke lakh mana karne par bhi ek hi mandap me Kanchan aur Madhvi dono ki shaadi ho gayi. Shaadi ko teen saal beet gaye. Kanchan ko ek beta aur Madhvi ko ek beti ho chuke the. Madhvi ne kabhi socha bhi nahi tha ki pati ka pyar aur beti ka sukh use itni zyada milegi ki wuh apne beete dino ke dukh takleef ko bilkul bhool jayegi. Rajan ke ma baap aur bhai bahen Madhvi ko itna chahte the ki kaha nahi ja sakta. Madhvi ko aakhir bhagwan par vishvas rakhne ka phal mil hi gaya.

Contributing Story Teller:  Amita enjoys writing stories and poems. She has strong editing and translation skills. amita17149@hotmail.com

Want to get a short story written for children? Do you want someone to write inspirational stories for your magazines, website or newsletter? Contact her at amita17149@hotmail.com


 Common Job Profiles - Writing Industry

Web Content Writer

Website Copywriter

Creative Writer

Article Writers

Travel Writers

Research Writer

Copy Editor

Technical Writer

Ghost Writer

Translator

Proof Reader

Content Writer Blog

Writing Resources
Writing Tip : Children's Story Writing is a good creative outlet and can be used to inspire others.






 

Web Content Writing Services, India | Contribute Short Stories in English & Hindi

Sitemap

Home

 

Content Writing News | Online Writing Job Profiles | Content Writer Blog |  Online Press Release | Post Part Time/Freelance Jobs | Writing Courses


Copyright 2005 - 2013, contentwriter.in , contact@contentwriter.in

Creative Story Writing India | Free Article Submission Services