Nanhi
Champa
Dopahar ke teen baje the.
Jade ke din the. Malti chat par baithi magazine ke panne palat rahi thi.
Bacche abhi school se nahi aaye the aur pati office me the. Achanak pheri
lagati hui choti panch varshiya Champa aur uske pita Shankar ki awaz aayi
"churi le lo, rang birangi kamdar kalai ki shobha badhane wali churiyan."
Phir Champa apni totli awaz me pukarti "chuli le lo, acchi acchi hain
hamare paas."Malti roz ye aawazen sunti thi par kabhi unhe roka nahi. Aaj
pata nahi kyun usne uthkar munder se jhanka aur pukara " Champa ruk ja,
main dekhoongi aaj."
Neeche utarkar usne
baramde me aakar darwaza khola aur haath lagakar tokri neeche utarwayi.
"Shankar aaj to vakayi bade pyare rangon ki churiyan laaye
ho. Zara gulabi aur baijni rang ki kamdar churiyan mere naap ki
nikalo." "Aapko to bibiji sava do maap chalega. Abhi dikhata
hoon,"kahkar Shankar ne neeche se sambhal kar sundar churiyan
dikhayi. Malti ne pasand kar ke dono rangonke do do darjan liye.
Chalees rupaye paakar Shankar khush ho gaya. Kahne laga" aaj
bibiji bilkul hi bikri nahi hui thi. Main soch hi raha tha ki aaj
to phanke karne karenge par aapki daya se roti ka intjam apni Champa
ke liye kar paoonga. Jab se iski ma mari hai, mujhe iski badi chinta
rahti hai. Jee raha hoon to bus iske liye varna Parvati ke bina
jiya nahi jata," kahte kahte uski aankhen bhar aayin. "Tumne
bataya nahi Shankar tumhari bibi kaise mari. kya bimar thi?"
Malti ne poocha. "Haan bibiji use malaria ho gaya tha. Gaon
me theek se ilaj nahi ho paya aur shahar lane ke pahle hi chal basi."
Shankar ne bhari awaz me kaha.
Is beech Champa sab kuch
chupchap sunti hui tokri saja rahi thi. Kabhi Malti ko dekhti to
aisa lagta jaise kuch kahna chahti ho par kah nahi pa rahi. "Champa
tere liye didiyon ne ek gudiya rakhi hui hai. Thahar, main abhi
lati hoon," kahti hui Malti andar chali gayi. Jab bahar aayi
to uske haath me ek dulhan ke kapdon me saji gudiya thi. Champa
ko dete hue usne kaha " lo Champa ise apne paas rakhna. Ye
ab teri gudiya hai."
|
|
Champa ne gudiya
liya aur muskara diya. Malti ko achanak laga jaise kai phool
ek saath khil gaye hon, itni pyari thi us nanhi si jaan ki
muskan. 'Accha bibiji, ab kabhi naye design ki churiyan laaonga
to aapko pahle dikha doonga. Lena na lena aapki marzi. Chal
Champa aage chal. Bhagwan chahega to itni acchi bohni ke baad
aur thodi bikri ho jaye." Shankar ne kahte hue tokri
sar par jama li. Champa ne ek haath me gudiya pakda aur doosre
se pita ka kurta tham liya.
Sham ko pati
ke aane par usne churiyan dikhayin to Vinay ne kaha "aur
rango ki le li hoti. Main chahta hoon tumhari kalayiyan har
roz rang birangi churiyon se bhara rahe. Aajkal ki auraten
to khali haath rahna chahti hain. Bhai, mujhe to bilkul pasand
nahi."Anju manju ne bhi pita ki haan me haan milate hue
kaha "ma tum roz naye rang ki sari se matching churi
pahno. bahut accha lagta hai. Anju gyarahvi me padh rahi thi
aur Manju aathvi me. Paas hi me unka school tha. Paidal chali
jati thin. Vinay ka office door tha par private company hone
ke karan chartered bus me aane jaane ki suvidha thi. Vinay
ke vinamrata se unke boss unhe bahut pasand karte the.
|
Kareeb do hafte beet
gaye. Phir ek dopahar kuch silayi ka kaam liye Malti chat par baithi
thi. Achanak kisi bacche ki awaz aayi "chuli le lo, acchi acchi
layi hoon." Malti ne neeche gali me jhanka to dekha ki Champa
ek choti churiyon se bhari tokri sar par uthaye chal rahi thi. Usne
pukara "ruk ja Champa. Abhi aati hoon." Malti ne bahar
ka darwaza khola to Champa jhat uske paas aa gayi. Tokri utarwa
kar Malti ne poocha " tere bapu kahan rah gaye. Tu akele kyun
aayi hai." Itna kahna tha ki Champa uske gale lipatkar rone
lagi. "Bapu mal gaye bibiji. Gadi ke neeche aa gaye."
Malti ki aankhen bhi bheeg gayi aur usne Champa ko chup karate hue
kaha "ro mat Champa. Main sab kuch theek kar doongi. Tu baith,
main tere liye biscuit lati hoon." Champa ko biscuit aur sharbat
dete hue Malti ne poocha "Champa ab tu kiske saath rahti hai?"
"Mela koi nahi hai bibiji. Ma ki to mujhe yaad bhi nahi hai.
Akele jhuggi me rahti hoon," kahte kahte Champa ki aankhen
dubara bheeng uthi. "Kya tumhara koi rishtedar nahi hai Champa?"
Malti ne uski aankhon se dhalke aansu ko apni aanchal se ponchte
hue poocha. "Nahi bibiji, bapu tha mela aur koi bhi nahi."
"Raat ko akele sote dar nahi lagta?" "Raat ko main
soti hi nahi, baithi rahti hoon. Din me thola thola so leti hoon."
"Aur khane ka kya karti ho?" "thole paise bapu ne
mele shaadi ke liye chupake lakkhe the unhi se dabal loti aur chai
pas ke dukan se leke kha leti hoon."
Choti si Champa ki baaton
ko sunkar Malti ki aankhen bhar aayin aur usne jhat Champa ko god me bitha
liya. Is nirdayi samaj ke thekedaron me itni himmat kahan jo ve ek anath
besahara nanhi si jaan ki dekhbhal kar saken. Bichari ne kitne dino se
ghar ka khana nahi khaya tha. Kaise log rahte the uske aaspaas jinhone
itna bhi nahi socha. Aaj ke log manushya kum aur pashu pravitti zyada
rakhne lage hain. Kisi ko khud ke siva kisi ki koi parvah hi nahi. Dhikkar
hai aise samaj aur usme rahne wale khudgarz logon par.
Anayas hi Malti Champa ko
god me hilane lagi thi aur use iska aabhas bhi nahi hua. Sochte
sochte aur yun hi baithe sham ho gayi. Bacche bhi school se aa gaye.
Champa god me hi so chuki thi. Use andar sulakar aur uski tokri
rakhkar Malti ne bacchon ko uske pita ke bare me bataya to dono
ek saath bol pade, "ma tum ise apne paas hi rakh lo. Samjho
tumhe do nahi teen betiyan hain. Aur haan ma ye hamare school me
hi padhegi. Main maam se baat karoongi," Anju ne kaha. Malti
ko laga jaise uski mansik gutthi ko bacchon ke pyar ne milkar suljha
diya hai. Wuh khud bhi yahi to chahti thi. Itna sochkar hi ki choti
si pyari si Champa aaj phir dabal roti chai par guzara karne akeli
jhuggi me raat bitayegi, uska man kharab hone laga tha. Lekin itni
badi baat wuh pati ki rai ke bina tay nahi kar sakti thi.
Besabri se Vinay ka
intezar karne lagi. Aakhir ghadi ne sade che baja hi di aur darwaze
ki ghanti bajne lagi. Malti ne daur kar darwaza khola aur pati ka
briefcase sambhalte hue chai lati hoon kahkar andar paaon badhaye.
Chai nashte ke baad dheere dheere Malti ne Vinay ko Champa ke bare
me sab kuch bataya. Vinay ne sari baaten suni aur phir Malti se
kaha "tum acchi tarah soch lo Malti. Palna to tumhe hi hai.
Mujhe koi eitraz nahi. Aakhir insaan ki bacchi hai log paltu janwar
palte hain ti kya hum aise gaye beete hain ki ek nanhi besahara
bacchi ko nahi paal sakte. Main sochoonga bhagwan ne mujhe teen
betiyan di hain." Malti ne uthkar pati ke paon choo liye. Unki
baaton se uska dil bhar aaya tha. Bhagwan ne use aisa samajhdar
pati diya tha jiske liye wuh sada aabhari rahegi. Pati ke sahare
, salah aur madad ke bina wuh Champa ko god lene ka nishay nahi
kar sakti thi.
Kareeb ghante baad achanak
Champa ki neend khuli to usne khud ko Manju ke paas paya. Ghabdakar uthi
hui usne pukara "bibiji galti ho gayi main so gayi accha ab ghar jati hoon."
Malti ne use god me uthate hue kaha "nahi Champa ab tu kahin nahi jayegi.
Main tumhe hamesha ke liye apne paas apni beti banakar rakhoongi." "Sach
bibiji, main didi ke paas rahoongi," kahte kahte Champa hansne lagi aur
uski madhur gunjan poore ghar me sugandh ki tarah phail gayi.
Contributing Story Teller: Amita enjoys
writing stories and poems. She has strong editing and translation
skills. amita17149@hotmail.com
Want to get a short
story written for children? Do you want someone to write inspirational
stories for your magazines, website or newsletter? Contact her at
amita17149@hotmail.com
|
