Content Writer India

Story About A Woman's Determination

 

About contentwriter | Contact Us

Submit your Story, Article or Poem

Know More About Our Services

Contact Us contact@contentwriter.in

Advertise With Us

 

Khushi Ke Aansoo

 

Sudha ke pati Sudhanshu ka dehant ek bus durghatna me ho gaya. Tab uski shaadi ke sirf dus saal hue the. Jab tak uske pati zinda the uski zindagi khushiyon ke khazane se bhari padi thi. Unke na rahne par nirasha ke siva kuch nahi tha Sudha ke jeevan me. Uska beta tab sirf saat saal ka tha. Rahul apne papa ko bahut miss karta tha. Sudha ke liye jeene ka maksad ab sirf uska beta tha. Jab wuh duniya me aya tha tab hi uske pita ne apne bete ko doctor banane ka sapna dekha tha. Sudha ko unki baaten yaad aateen to wuh aansooyon ko rok nahi pati thi. Himmat ke saath usne apne bete ki parvarish par apni sari shakti laga dee.

School me acche number laane ke liye wuh khud har shaam Rahul ko padhai me madad karti thee. Ganit aur vigyan padhane ke liye usne tuition laga diya tha. Apna samay bitane ke liye usne silayi class me apna dakhila kara liya aur jaldi hi wuh silai kadhai me maahir ho gayi.  Ghar me wuh kaaloni ki auraton ke liye blouse, petticoat, shalwar, kurta wagayrah silne lagi. Uske acche kaam aur sheelta bhare vyavahar ke karan zyada se zyada auraten usi ke paas aana pasand karti theen. Button taakne, fall lagane aur turpayi wagayrah ke liye usne do besahara auraton ko bhi kaam pe rakh liya tha. Rami aur Vimla duniya me bilkul akeli theen. Unko khud Sudha ne silai ka kaam sikha diya tha aur thode paise bhi unhe deti thi. Dono auraten usko bahut manti theen aur silayi ke kaam me jitna ho sake uski madad karti theen.

Dheere dheere samay beetta gaya. Rahul ab bada ho gaya tha. Sudha ne jee tod mehnat ki thi aur ghar ko thode paison me chala kar usne paise jama kiye the. Rahul ki doctari ki padhai me chahe jitne paise lagenge wuh laga degi, yahi usne socha tha. Thode paise pati ne bhi bank me chode the, baki wuh gahne bhi girvi rakh sakti thi. Use maloom tha ki uske padosi itne acche the ki parivar ke sadasya bhi itne acche nahi ho sakte the. Zaroorat padne pad unme se har koi Sudha ko har prakar se madad karne ko tayaar tha.

Eeshwar iccha se Rahul ka dakhila MBBS ki padhai me bina paise ya sifarish ke hee competition me baithne se pahli baar me hi ho gaya. Sudha ki khushi ka thikana na tha. Usko mano sab kuch mil gaya. Bade shahar me dakhila hua tha aur uske bete ko dus din ke andar hi jana tha. Sudha ne man lagakar tyariyan shuru kar deen. Sabse pahle to usne Rahul ko le jakar uske liye pant, shirt, pyjama, kurta, zurab, roomal, tauliya wagayrah dher saare khareed diye. Usne socha pata nahi mere bete ko kapde dhone ka samay kab milega. Joote chappal, baksa bag, ek naya tiffin ka dabba bhi wuh le aayi. Ek hafte pahle se hi usne bete ka saamaan jamana shuru kar diya. Padhai ki kitabon ke liye aur kharche ke liye bhi paise Rahul ke paas rakhwa diye. Ab sirf do din bache the. Silai ka kaam do din band kar Sudha ne Vimla aur Rami ke saath milkar thode khane ka saamaan bana liya jo kuch din rakha ja sakta tha. Namak aur shakkar pade, gujiya, besan ki bhujiya masale wale samose wagayrah wagayrah usne bade pyar se banaye.

Jis din Rahul ko train pakadni thi us din subah se hi ho halla shuru ho gaya tha. Pados ki Banaras wali chachiji ne Rahul ke liye laddu banaye the. Laakar unhone awaz lagai - "Arey Sudha, ye le maine Rahul ke liye laddu bandh diye hain. Use de dena" kahte hue unki aankhen bhar aayeen. Thodi der baad hi Radha tayi haanfte haanfte darwaze par aayeen aur kaha - "Rahul bete, dekho moti tayi ne tumhare liye dal bhari pooriyan banai hain. Yuh kharab nahi hongi. Do ek din rakhkar khana." Rahul ne aakar tayi ko gale lagaya aur kaha - "Arey tayi aapka aashirvad hi kaafi tha. Aapne mere liye itni mehnat kyun ki?" Tayi ne pyar se uske sar par haath phera aur sari ki paluu se aankhen ponchti huin ghar ko chali. Vimla aur Rami ne Rahul ko khud ke paison se khareed kar ek bahut sundar choti si Shankar bhagwanji ki moorti dee kyunki wuh Shambhunaath ka bachpan se hi bhakt tha. Rahul ne paaon chookar dono ka aashirvad liya. Sudha ne aansuyon ke beech muskara kar bete ko vida kiya. Bhaari man se usne bete ka matha chooma aur uske dost Pappu aur Shyam ke saath station bhej diya.

Paanch saal beet gaye aur Rahul doctor bankar ghar lauta. Is baar jo aansoo Sudha ne bahaye wuh khushi ke aansoo the. Uske pati ka sapna jo poora hua tha.

Contributing Story Teller:  Amita enjoys writing stories and poems. She has strong editing and translation skills. amita17149@hotmail.com

Want to get a short story written for children? Do you want someone to write inspirational stories for your magazines, website or newsletter? Contact her at amita17149@hotmail.com


  Common Job Profiles - Writing Industry

Web Content Writer

Website Copywriter

Creative Writer

Article Writers

Travel Writers

Research Writer

Copy Editor

Technical Writer

Ghost Writer

Translator

Proof Reader

Content Writer Blog

Writing Resources
Writing Tip : Children's Story Writing is a good creative outlet and can be used to inspire others.






 

Web Content Writing Services, India | Contribute Short Stories in English & Hindi

Sitemap

Home

 

Content Writing News | Online Writing Job Profiles | Content Writer Blog |  Online Press Release | Post Part Time/Freelance Jobs | Writing Courses


Copyright 2005 - 2013, contentwriter.in , contact@contentwriter.in Creative Story Writing India | Free Article Submission Services