|
|
|
Jeevan
Chakra
Yeh
jeevan chakra bhi bahut ajeeb hota hai ,har dukh ke baad sukh aur
phir dukh aata hai usi tarah jis tarah har patjhad ke baad basant
kaa aana tay hai. Shah parivaar ke bhi apne thaatt thae. Unka bhara
poora basa basya ghar jisme Kamal Shah unki patni Vibha Shah, unki
maa Sharda Shah aur unki choti si beti Neha Shah rahti thae. Iss
parivaar mein jaise khushiyon ka dera tha aur duur duur tak gum
ka namonishan tak nahin tha.
|
|
Ek shaam Neha
apni saheliyon ke saath apne ghar ke aangan mein khel rahi
thi. Khelte khelte achanak uski nazar apni maa par padi .Woh
chup chap khadi ghanto apni maa ko takti rahi, uski sabhi
saheliyan ek ek kartke apne ghar ko chali gayi phir bhi woh
wahi khadee apni maa ko niharti rahi. Aisa nahin tha ki woh
apni maa ko pehli baar dekh rahi thi, aur naa hi uss din koi
khaas baat thi, bas eka ek Neha ko apni maa ki sundarta ka
ahsaas ho aaya.
Chaand sa mohak
roop, kaajal bhari aankhein, gulab ki pankhudi –se honth,
maathe par choti si lal bindi, lambe resham se baal aur badi
hi adaa se lapeti neeli saari mano koi neel pari samne khadi
ho.
|
Tabhi achanak kaanch
ka glass tootne ki awaaz aati hai…………… Neha chonk jati hai phir
bhi stabh khadi khidki ko niharti rahati hai uski neel pari dheere
dheere ankhon se ojhal ho rahi hai woh jaise hi use rokne ke liye
haath badhati hai. Ek haath uske kandhe par aata hai aur woh jaise
hi peeche mood kar dekhti hai uske aascharya ka thikana nahin rahata.
Uski neel pari uski aankhon ke saamne khadi hai par uska roop badal
chukka hai. Ab uss chaand se mohak roop par jhooriyon ka dera hai,
ankhon mein soonapan, maathe par khalipan, aur saari mein se rang
jata raha hai, purnatah shwet vastron mein woho mere saamne khadi
hai. Aur neha apne aap ko sambhalte hue kehti hai ………..
Meri maa ke neel pari
roop se safed saari tak ke beech mein bees saalon ka antar hai jisme
hamne apne parivaar ke logon ko kho diya, unke bina jeena siikh
liya, apne ashko ko chipana siikh liya hai.
Aaj meri shaadi hai, meri maa ne mujhe dulhan ke roop mein sajaya
hai aur apni khoobsurti mujhe de di. Jab log meri sundarta ki taarif
karte hai to mein bade itrake kehti hoon ki yeh to meri maa ki dein
hai lekin yeh baat bhi samajh aa gayi ki har kali ko khil kar phool
bananna aur har phool ko ek na ek din murjhana hai shayad yehi jeevan
chakra hai.
Contributing Story Teller: Ruchi Modi is
a 23 year old working girl with a reputed production house. She
enjoys writing short stories and poems and aspires to make her mark
in the field of writing.
ruchii.modi@gmail.com
|
|
|
|
