Content Writer India

Story About An Ordinary Man's Loyalty & Devotion

 

About contentwriter | Contact Us

Submit your Story, Article or Poem

Know More About Our Services

Contact Us contact@contentwriter.in

Advertise With Us

 

Insaniyat

"Mummy mummy dekho Chandan pukar raha hai. Use bula lo na mummy. Hum mitahi lenge," kahte hue Ratan ne apni ma ka aanchal kheencha. "Haan , haan mummy main aaj gulabi wali loongi," Shalini ne bhi haan me haan milai. Nirmala ne bacchon ke zid ke aage haar maan lee aur khidki ke paas jakar aawaz dee - "Arey Chandan, bhaiyya aana zara. Ratan aur Shalu bula rahe hain tumhe." "Abhi aya bibiji," Chandan ne bag sambhalte hue kaha. Baramde me aa usne apna bag khola aur mithaiyon ke dabbe nikalne laga. "Haan Ratan bhaiyya, kaun sa loge aur tum munni, tumhe to yah laddu pasand hai na?" Chandan ne dono bacchon ke haath par ek ek mithai rakh dee. Nirmala ne paise dete hue kaha "Chandan tumhari mithaiyan bahut tazi hoti hain. Dukano me bhi itni acchi nahi milti. Lekin tum paise kyun kum lagate ho?" Chandan ne muskarate hue kaha "didiji, kahoon na aapko didi? Haan to main paison ke liye nahi ata. Main to bacchon ki khushi ke liye ghoomta hoon. Mujhe unse bada lagav hai. Ghar me paison ki tangi nahi hai." "Tum to Chandan bilkul pagal ho. Log yahan sabhi ko lootne me lage hain aur tum to bacchon ko aate hi ek ek mithai waise hi khila dete ho. Itna nuksan kyun uthate ho?" "Didiji mera nuksan nahi balki fayeda hota hai. Jab Ratan aur Shalu mujhe apna hansta hua chehra dikhate hain, tab jo anand ka anubhav mujhe hota hai uska andaza aap nahi laga sakteen," Chandan ne muskarate hue kaha.

Sham ko jab bacchon ke papa ne chai ke saath mithai dekhi tab kahne lage "lagta hai  Chandan aya tha. Kyun sach hai na Nimmo?" "Haan papa, par aapne kaise jana?" Ratan aur Shalu ek saath bol uthe. "Arey mithai ki tazgi se main samajh gaya." "Haan sach me, Chandan ki mithaiyan bahut acchi hoti hain. Khaskar sandesh to bahut hi swadisht hai," Nirmala ne chai ka pyala Ramesh ko dete hue kaha.

 

Thode dino baad hi bacchon ke imthaan the, isliye Nirmala bahut vyast rahne lagi thi. Ghar ke kaam ke alawa bacchon ko padhana bhi padta tha. Somvar ka din tha. Bacchon ko imthaan ke baad ek din ki chutti mili thi. Ghar ke paas wale park me circus ka show laga tha. Bacche bahut zid kar rahe the. Nirmala ke pati us din office me zyada kaam ke karan der se aane wale the. Circus shuru hone me sirf bees minute bach rahe the. Bacche tyaar the par Nirmala ke sar me bada tez dard tha aur usse utha nahi ja raha tha. Wuh bacchon ko nirash nahi karna chahti thi par tabiyat kharab hone se use samajh nahi aa raha tha ki kya karen.

Itne me ghanti baji. Khola tab Chandan ko khada paya. "Didiji, bahut dino se Ratan bhaiyya aur Munni ko nahi dekha isliye chala aya. Kya baat hai? Aapka chehra kyun pheeka pad raha hai?" "Aao Chandan baitho," kahte hue Nirmala ne use apni saari pareshani batayi. Sunkar Chandan bol pada "to isme pareshani ki kya baat hai didi. Aap aaram kar lo. Main bacchon ko circus dikhaye lata hoon. Chalo bacchon." "Arey Chandan tumhare pheri ka kya hoga? Kitna nuksan hoga." "Phir wahi baat didi. Kuch nahi hoga. Aap goli khakar so jaiye. Show khatam hote hi main inhe le aaonga aur haan yahan kone me main apna bag rakh deta hoon." " Mummy hum jayen?" Bacchon ki minnat bhari aankhon ke aage Nirmala ko jhukna hi pada. "Theek hai. Jao par Chandan bhaiyya ko bilkul tang mat karna," Nirmala ne bacchon ko roomal pakdate hue kaha. "Arey didiji aap kyun chinta karti hain. Shalu aur Ratan mere bhi to bacchon samaan hain. Wo mujhe bilkul tang nahi karenge. Kyun bacchon, chalo jaldi nahi to show shuru ho jayega." "Arey Chandan bacchon ko maine ticket ke paise de diye hain." "Theek hai didi. Ab hum chalte hain. Bacchon ruko, mera haath pakad lo," Chandan ne bag rakh dono bacchon ka haath pakad liya. Ratan aur Shalu ma ko tata karke khushi khushi chale gaye.

Bacchon ke jate hi Nirmala ne darwaza band kiya aur phir sar dard ki goli khakar let gayi. Goli ne asar dikhayi aur use neend aa gayi. Uthi to sava saat baj rahe the. Usne jhat chai banake pee aur phir raat ke khane ki tyaari me lag gayi. Dekhte hi dekhte aath baj gaye par bacchon ka kahin pata na tha. Ab Nirmala thoda ghabrane lagi. Usne socha saat baje show khatam hua hoga. Ab tak to aa jana chahiye tha. Ghadi ne jab sadhe aath baja di tab to wuh paseena ponchte hue bahar aa khadi hui. Man me aaya ki Chandan to bahut bekar nikla. Na jane bacchon ko kahan le gaya. Logon ki baaten dimag me ghoomne lagin. Aajkal sab jagah thug ghoomte rahte hain. Kisi par vishvas nahi karna chahiye. Ghabrakar usne Nalini ko phone kiya. Wuh uski sabse pyari saheli thi. "Arey Nimmo, tumne ek pheri wale ke saath bacchon ko bhej diya. Dimag kharab hai kya? Kisi par itna bharosa. Accha suno, aadhe ghante aur dekho nahi to bhai sahab ko phone karo. Wo pata laga lenge. Mujhe bhi batana kya hua. Aadhe ghante tak tumhara phone nahi aya to main Subhash ko lekar aa jaaongi. Theek hai. Accha rakhti hoon. Ghabrana bilkul nahi."

Ramesh ko batane ke baat se hi Nirmala kamp gayi. Usne socha bahut dant padegi. Main bhi kitni pagal hoon. Kyun bheja maine bacchon ko Chandan ke saath. Pata nahi kahan le gaya. Soch soch kar Nirmala ne jab ghadi me nau bajte dekha tab tala lagakar khud dhoondhne nikal padi. Abhi ghar ki gali ke nukkad tak pahunchi hi thi ki Shalu ke rone ki awaz sunayi di aur usne bacchon sahit ek ghayal se Chandan ko aate dekha. Bacche thode mitti mein sane deekh rahe the par Chandan to buri tarah chot khaya lag raha tha. Ghar ke dehleez par pahunch kar Chandan baith gaya aur haafne laga. "Kya hua Chandan?, kuch to bolo" Nirmala ne paani ka glass use pakdate hue kaha. "Arey mummy Chandan bhaiya ne hume bachate hue chot khayee hai," Ratan ne rote hue kaha. "Mujhe kuch samajh nahi aa raha Ratan. Theek se batao." "Mein batata hoon didi," Chandan ne muh poochte hue kaha. "Show khatam hone hi wala tha ki kisi ne afwah phaila dee ki park mein bomb rakha hua hai. Phir kya tha. Log buri tarah se wahan se bhagne lage. Aisee bheed umdi ki log ek doosre par girne lage. Maine ek taraf bacchon ko bitha liya aur bheed chatne par wahan se chala." "Mummy, Chandan bhaiya ne hamare upar apne ko dhal banalee aur log bhagte hue bhaiya ke upar se ho kar nikalne lage. Pata nahi kitne logon ke pao tale kuchle gaye hai Chandna bhaiya par humare upar koi aach nahi aane dee," Shalu ne aansoo ponchte hue kaha.

Nirmala ki aankhen bhi bheeng aaye theen. Usne first aid box ki sahayta se Chandan ki marham patti ki, phir use pain killer dekar charpai daal kar baramde mein lita diya. Is beech Ramesh bhi aa gaye aur unhone jab saari baatein suni tab rasoi mein aakar Nirmala se kahan "Dekho to Nirmal, Chandan kitna saccha insaan hai. Itna to hum bhi bacchon ke liye nahi kar paate." Nirmala ke man mein pashchatap ki aandhi uth rahi thi ki kyun usne Chandan ke baare mein galat socha. Usme jo insaaniyat thi wuh to ameer aur bade bade logon, rishtey daron ya padosiyon mein bhi nahi dikhayee deti. Raat ka khana Chandan ne Verma parivar ke saath khaya aur ghar jaate jaate use gyarah baj gaye. Nirmala ne sankalp liya ki bina wajah ke shak shanka ko kabhi wuh man mein ghar nahi banane degi.

Contributing Story Teller:  Amita enjoys writing stories and poems. She has strong editing and translation skills. amita17149@hotmail.com

Want to get a short story written? amita17149@hotmail.com


  Common Job Profiles - Writing Industry

Web Content Writer

Website Copywriter

Creative Writer

Article Writers

Travel Writers

Research Writer

Copy Editor

Technical Writer

Ghost Writer

Translator

Proof Reader

Content Writer Blog

Writing Resources
Writing Tip : Children's Story Writing is a good creative outlet and can be used to inspire others.






 

Web Content Writing Services, India | Contribute Short Stories in English & Hindi

Sitemap

Home

 

Content Writing News | Online Writing Job Profiles | Content Writer Blog |  Online Press Release | Post Part Time/Freelance Jobs | Writing Courses


Copyright 2005 - 2013, contentwriter.in , contact@contentwriter.in Creative Story Writing India | Free Article Submission Services