Bhor Ho Gayi

Pankh katar do chidiya ke fir pucho use tu udti kyun nai
Lehron ke sang befikar behne do nauka fir socho ye mudti kyun nai
dono ankhen band kar lo fir bolo duniya dikhti kyun nai
khud hi chod do jeene ki asha fir boojho jindigi katti kyun nai

see kar apne adhron ko muskane ki chah chod do
tanik b kathinai jo aye to jhat se apni rah mod do
thukraye jo the kabhi tumne pathar aj lagne do unhe
jab aye samay bhari to darkar apna dhairya tod do

Rah ko kathin samajh ke kabhi kadam badhaya hi nai
dar gaye un sayon se jinhone kabhi tumhe daraya hi nai
ujala na dikha to andheron me ghir gaye
kabhi un andheron se nikalne ka sahas jutaya hi nai

Sahas juta ke agar tumne ek kadam badha liya hota
aur andheron ko katne ke liye ek diya jala liya hota
darane wale tumhare honsolon se khud dar gaye hote
agar tumne alas taj kar mehnat ko gale laga liya hota.

ab jaago nai umang se mat samjho ke der ho gai
hasraten tumhari hi hain mat samjho wo ger ho gai
jo kho diya use paraya samjh kar bhul jao, utho
pane ki chah me niklo, dekho, wo shaam biti fir bhor ho gai.

Contributed By : Ravi Prakash Garg, Pune, India ravigarg1216@gmail.com